მიშა ანდღულაძე, რომელსაც ნიდერლანდებში თავს დაესხნენ, ambebi.ge-ისთან მომხდარის დეტალებს იხსენებს – მსახიობი ამბობს, რომ მასზე განხორციელებული ანგარიშსწორება წინასწარ იყო დაგეგმილი.
მისივე თქმით, 10-მდე პირის მიერ მიტანილი იერიშის შემდეგ პროცესებში ჰააგის პოლიცია ჩაერთო და სწორედ გამოძიებამ უნდა დაადგინოს სიმართლე.
მიშა ანდღულაძე მომხდარს რელიგიურ ხუმრობას უკავშირებს.
კარგად ვარ, ყველაფერი წესრიგშია. ჰააგის პოლიცია ჩართულია, იმედია გამოიძიებენ. ეს იყო დაგეგმილი თავდასხმა, ათი კაცი ერთზე. თან სხვა რამ მოხდა და სხვა რაღაც დაწერეს პოსტში, თითქოს, (“ქართული ოცნების”) ამომრჩევლებს რუსები ვეძახე, როცა რეალურად, ჩვეულებრივი კომედი საღამო გვქონდა. ძალიან ჰგავს წინასწარ დაგეგმილ ამბავს. მითუმეტეს, ვინც იღებდა ის… რაღაც სტატისტიკაში ხომ არ მოვყევი, ჯოჯოხეთია სრული.
მანამდე პროკურატურაში მქონდა საქმე, სთენდაფის ერთ-ერთ ხუმრობაზე, რომელიც ეხებოდა რელიგიურ თემას, ფარისევლობას, ჯვრების უაზრო ადგილებზე აღმართვას. შემდეგ მე მღვდელთანაც მქონდა ამაზე გადაცემაში საუბარი. ახლა, თავდასხმისას როდესაც მოვიდნენ, თითქოს ამაზე დაიწყეს საუბარი, მერე გადავიდნენ პირდაპირ თავდასხმაზე, პოლიცია ჩაერთო და ჩემი მონაცემები აქვთ. ადრეც იყო ჩემზე თავდასხმები, საქართველოს პროკურატურამ ძალიან კარგად გამოიძია ეს საქმე და დაიბარეს ის ადამიანები. შემდეგ მე დამიბარეს და მითხრეს, რომ შეგიძლია ქუჩებში თავისუფლად იარო და არაფერი გემუქრებაო.
ახლა რაც მოხდა, თითქოს რელიგიურ ხუმრობას ეხებოდა, მაგრამ შემდეგ პოსტი რაც დადეს, თითქოს მე “ქართული ოცნების” მხარდამჭერებს რუსები ვეძახე და ამიტომ გამისწორდნენ, ეს არის გამიზნული ტყუილი. მე წინასწარ დასკვნებს ვერ გავაკეთებ. ეს ჯგუფი მოემზადა წინასწარ და თავს დამესხნენ, მეგობარმა გადამარჩინა. ისეთი აგრესიულები იყვნენ ვერც გავიგე, რა მოხდა. ჯერ რანაირი ქრისტიანობაა, ათი ერთს დაესხას თავს.
საქართველოშიც პროკურატურას ვეუბნებოდი, რომ ერთად დაგვიძახეთ მე და თავდამსხმელებს, ჩავეხუტები და ვაგრძნობინებ, რომ მე არ მძულს არავინ. ერთადერთი, მინდა, ყველა ვიყოთ უშიშრები განსხვავებული აზრის მიმართ. რა თქმა უნდა, არ დამიძახეს. ძალიან მძიმე სანახაობა იყო, მაგრამ ისინიც მსხვერპლები არიან საერთო აგრესიის.
კომენტარები რომ ვნახე და ვიღაცებს უხარიათ ადამიანების ცემა და მხოლოდ ნაცებად და ქოცებად განიხილავენ ადამიანებს. შეგვიძლია, რომ მარტივი კრიტიკის გამო ადამიანებს თავს დავესხათ, თან სად – ჰააგაში?! ვნახოთ, საქმე აღძრულია, ყველამ პასუხი უნდა ვაგოთ ჩვენს ქცევებზე.
ასეთი დაგეგმილი, მასშტაბური თავდასხმა, გადაიღეს.
და მერე იქ ვიღაცა უყვებოდა – ვიღაცას ტელეფონზე ულაპარაკია, საქმე ჩაბარებულიაო…
დაგეგმილია, შეკვეთილია თუ რა მიზანი ჰქონდათ, ვნახავთ… დაველოდოთ გამოძიებას”, – აცხადებს მიშა ანდღულაძე Ambebi.ge-სთან.
ნიდერლანდებში, ერთ-ერთი ქართული რესტორნის მიმდებარედ, მიშა ანდღულაძეს ფიზიკურად გაუსწორდნენ – სოციალურ ქსელში გავრცელებულ ვიდეოკადრებში ჩანს, თუ როგორ ესხმის თავს მსახიობს 7-მდე პირი.