ქუთაისში მელიტონ ბალანჩივაძის სახელობის მუსიკოს-შემსრულებელთა საერთაშორისო კონკურსი გაიხსნა. აღნიშნული კონკურსი წელს საიუბილეოა და ქუთაისი უკვე მეათედ მასპინძლობს მას. საერთაშორისო ღონისძიების გახსნის ცერემონიალს ქუთაისის მერის მოვალეობის შემსრულებელი დავით ერემეიშვილი დაესწრო.
„მელიტონ ბალანჩივაძის სახელობის ახალგაზრდა მუსიკოს-შემსრულებელთა საერთაშორისო კონკურსი უკვე ერთ-ერთი საუკეთესო ტრადიციაა ქუთაისისთვის. 10 წელია ჩვენი ქალაქი და ეს კონკურსი მასპინძლობს გამორჩეულ მუსიკოსებს მსოფლიოს მრავალი ქვეყნიდან – როგორც კონკურსანტებს, ასევე, ჟიურის წევრებს. ნიშანდობლივია, რომ წელს კონკურსი ეძღვნება ქუთაისის მ. ბალანჩივაძის სახელობის ცენტრალური სამუსიკო სასწავლებლის დაარსების 105 წლისთავს. მოხარული ვარ, რომ ჩვენ შევძელით და სრულიად განვაახლეთ ეს დიდი მუსიკალური ტრადიციების მქონე სკოლა. ქუთაისის მუნიციპალიტეტის მერიის მხარდაჭერა კონკურსს დაარსების დღოიდანვე აქვს.“- განაცხადა დავით ერემეიშვილმა.
წლევანდელი კონკურსი 1-6 აპრილს გაიმართება. კონკურსის ჟიურის წევრები საერთაშორისოდ აღიარებული მუსიკოსები არიან. ჟიურის თავმჯდომარეა პარიზის კონსერვატორიის პროფესორი გოგლა ქაცარავა. ასევე, ჟიურის წევრები არიან პორტუგალიელი პიანისტი ჟოა კოსტა ფერეირა, იტალიელი პიანისტი და ბერგამოს მუსიკალური აკადემიის პროფესორი ჩაო ტანგი და ცნობილი პიანისტი მატეო კორიო. მელიტონ ბალანჩივაძის სახელობის მუსიკოს-შემსრულებელთა საერთაშორისო კონკურსის პარალელურად ჩატარდება საჯარო მასტერკლასები.