გუშინ, 1-ელ აპრილს, გურამიშვილის გამზირზე ძაღლს, რომელმაც მოქალაქეებს დაუყეფა პოლიციელმა ესროლა, – აღნიშნულ ფაქტს ადასტურებს შსს და აცხადებს, რომ გასროლა აუცილებელი მოგერიების მიზნით განხორციელდა.
განცხადების მიხედვით, პოლიციის თანამშრომელმა სამსახურებრივი იარაღი მაშინ გამოიყენა, როდესაც ქუჩაში მყოფმა ძაღლმა, მისი მცირეწლოვანი შვილის მიმართ აგრესია გამოხატა.
შსს-ში აცხადებენ, რომ შინაგან საქმეთა სამინისტროს თანამშრომელი, მის მცირეწლოვან შვილებთან ერთად გადაადგილდებოდა გურამიშვილის გამზირზე, რა დროსაც ძაღლმა აგრესია გამოხატა მისი 6 წლის შვილის მიმართ.
„პოლიციის მაიორი შეეცადა, რომ მოეგერიებინა ძაღლი, რის გამოც იძულებული გახდა აუცილებელი მოგერიების ფარგლებში სამსახურებრივი იარაღიდან განეხორციელებინა გასროლა. ძაღლი გადაყვანილია ვეტერინარულ კლინიკაში. ფაქტთან დაკავშირებით შედგა შესაბამისი რეაგირების ოქმი და მიმდინარეობს მოკვლევა”, – აღნიშნავენ შსს-ში.
მომხდარის შესახებ სოციალურ ქსელში მოქალაქე სალი გაგოშიძემ დაწერა და აღნიშნა, რომ მოქალაქე, რომელმაც ძაღლს ესროლა საპატრულო პოლიციის მანქანიდანვე გაუშვეს.