ქუთაისში, 9 აპრილთან დაკავშირებით, მოქალაქეები პროტესტის ჩვეულ ადგილას, მერიის წინ, ისევ შეიკრიბებიან.
პროევროპული აქციის მონაწილეები ამბობენ, რომ ქართველი ხალხის ურყევი ნებით მოპოვებული დამოუკიდებლობა დღესაც დასაცავია რუსული რეჟიმისგან, ამიტომ სხვებსაც მოუწოდებენ, შემოუერთდნენ აქციას,
“9 აპრილი საქართველოს უახლეს ისტორიაში ყველაფერია, რისთვისაც ქართველ ხალხს ოდესმე უბრძოლია. იგი ერთდროულად სავსეა ტრაგიზმითა და გამარჯვებით.
1989 წლის 9 აპრილს, გამთენიისას, რუსეთმა მშვიდობიანი მომინტიგეების ძალმომრეობითი დარბევა დაიწყო. მტკიცედ მდგარ ქართველ ხალხს უკან დახევაზე არც უფიქრია – უხმოდ ებრძოდა ერთმანეთს ჯარი და უიარაღო ხალხი.
21 ადამიანის სიცოცხლე შეეწირა რუსულ აგრესიას. მოგვიანებით, 1991 წლის 9 აპრილს (31 მარტის რეფერენდუმის საფუძველზე), საქართველოს დამოუკიდებლობა გამოცხადდა. ასე დაიბადა მეორედ საქართველოს რესპუბლიკა, ქართველი ხალხის მიერ პირველი რესპუბლიკის იდეისადმი ერთგულებით.
ქართველი ხალხის ურყევი ნებით მოპოვებული დამოუკიდებლობა დღესაც დასაცავია რუსული რეჟიმისგან! ამიტომ, გელოდებით 9 აპრილს, 19:00 სთ-ზე, ქუთაისის მერიის წინ, პროტესტის ჩვეულ ადგილას. ერთად შევქმნათ დიდებული წამი”,- აღნიშნულია ღონისძიების აღწერაში.
ქუთაისსა და საქართველოს სხვა ქალაქებში უწყვეტი აქციები 132 დღეა, მიმდინარეობს.