დავით დოიაშვილის გათავისუფლება ცხადყოფს, რომ ივანიშვილის მოძალადე ხელი, ადრე თუ გვიან, ყველას შეეხება, თუ ეს რეჟიმი დარჩება – რეჟიმს უჭირს!- ამის შესახებ „სტრატეგია აღმაშენებლის“ ლიდერმა, გიორგი ვაშაძემ განაცხადა.
მისი თქმით, „ეს ბრძოლა მხოლოდ დოიაშვილის კი არა, ჩვენი, ყველას ბრძოლაა“.
„დავით დოიაშვილის გათავისუფლება ცხადყოფს, რომ ივანიშვილის მოძალადე ხელი, ადრე თუ გვიან, ყველას შეეხება, თუ ეს რეჟიმი დარჩება.
მათ თეატრის სოლიდარობა, თავისუფალი აზრის გამოვლინება ვერ აიტანეს და გადაწყვიტეს, ყველა დასაჯონ.
ეს ბრძოლა მხოლოდ დოიაშვილის კი არა, ჩვენი, ყველას ბრძოლაა, ვინც არ აპირებს, შეეგუოს უსამართლობას და რეჟიმის მონურ მორჩილებაში დარჩეს.
რეჟიმს უჭირს! ბრძოლა გრძელდება გამარჯვებამდე!“- განაცხადა გიორგი ვაშაძემ.
კულტურის სამინისტრომ დავით დოიაშვილი „ვასო აბაშიძის სახელობის მუსიკისა და დრამის თეატრის“ ხელმძღვანელის თანამდებობიდან გაათავისუფლა. კულტურის სამინისტრო გადაწყვეტილების მიზეზებს განმარტავს და აცხადებს, რომ სამინისტროს მხრიდან „არაერთგზის გაფრთხილების“ მიუხედავად, „ვასო აბაშიძის სახელობის მუსიკალური კომედიისა და დრამის პროფესიული სახელმწიფო თეატრის“ ხელმძღვანელობა სადამფუძნებლო მიზნებით გათვალისწინებულ „ვალდებულებას არ ასრულებდა“, ხოლო „სახელმწიფო ბიუჯეტიდან მიღებული უწყვეტი დაფინანსების პირობებში, თეატრში შემოქმედებითი პროცესი თვეების მანძილზე შეჩერებული იყო“.
ვასო აბაშიძის სახელობის თეატრის სამხატვრო ხელმძღვანელმა რამდენიმე თვის წინ „საპროტესტო მანიფესტი“ გამოაცხადა. თეატრი, რომლის მსახიობი ანდრო ჭიჭინაძე საპროტესტო აქციებზეა დაკავებული რამდენიმე თვეა გაფიცულია.