სამეგრელოს ერთ-ერთ მუნიციპალიტეტში, (რომელსაც შეგნებულად არ ვასახელებთ), 8 წლის ბავშვზე ძალადობის ბრალდებით დაკავებული დედა და ბებია ბრალის წარდგენის მოლოდინში არიან. სოფელში სადაც ეს ფაქტი მოხდა, მეზობლებმა ნახეს, თუ როგორ დაადეს სახლის ეზოში ხელბორკილები სამართალდამცველებმა შუახნის ასაკის დედას და პენსიონერ ბებიას.
დაზარალებული ბავშვის დედა ერთ-ერთი საბავშვო ბაღში (კერძოდ, მომარაგებაში) მუშაობდა, ხოლო ბებია პენსიონერია. მეზობლები ამბობენ,რომ მოზარდი ამჟამად მამის ოჯახში იმყოფება, ხოლო მამა და მამის დედა ემიგრაციიდან აპირებენ დაბრუნენას.
„ადამიანი რომელიც ძალადობს საკუთარ შვილზე ეს არაფრით არ გამართლდება, ეს ბავშვი ჩემი შვილიშვილია . მთელი სოფელი იყო როგორც ერთი ოჯახი, ახლა რა შეიცვალა? ნუთუ ერთი ციცქნა ბავშვი რომ იტანჯებოდა ის აქამდე ვერ უნდა გვენახა. მართალია იტყვით თქვენ სად იყავითო? ჩვენ შორს ვიყავით, როდესაც დავურეკავდი, აგრესიულები იყვნენ, ამიტომ თავს ვარიდებდით. მამას კი არ უნდოდა კონფლიქტი. ბავშვის ნახვა სულ ენატრებოდა. ახლა ჩვენ გვერდით ვიქნებით, ყველაფერს გავაკეთებ ბავშვის ბედნიერებისთვის. იმედია, აწი მაინც დაგვიდგებით მხარში, მე არაფერი არ მინდა, არაფერს ვითხოვ, მხოლოდ დავიცვათ ბავშვი ერთად, ვიხსნათ ერთი ანგელოზი ძალადობისგან,“ წერს კომენტარის სახით სოციალურ ქსელში ერთ-ერთ პოსტზე ბავშვის (მამის მხრიდან) ბებია.
ცნობისთვის, სამეგრელოს ერთ-ერთ სოფელში, 8 წლის ბავშვზე ძალადობის ბრალდებით დედა და ბებია გუშინ დააკავეს.
ბრალის დამტკიცების შემთხვევაში მათ 3 წლამდე პატიმრობა ემუქრებათ. შსს-ს ცნობით, გამოძიებით დადგინდა, რომ მოზარდზე დედამ და ბებიამ ფიზიკურად იძალადეს. არასრულწლოვანს ძალადობის შედეგად, სხეულის სხვადასხვა არეში მრავლობითი დაზიანება აღენიშნება. არსებული ინფორმაციით, 8 წლის ბავშვი რამდენიმე დღის განმავლობაში დედა და ბებიას საღორეში ჰყავდათ დამწყვდეული. ბავშვმა გაქცევა მოახერხა და საშველად მეზობლად მცხოვრებ, მამის მხრიდან დიდ ბებიასთან და ბიძასთან მივიდა.