დემოკრატიებს მტკიცე დაცვა სჭირდებათ, მხოლოდ ხელშეკრულებები ვერასდროს იძლევა მშვიდობის გარანტიას, საქართველომ ეს 2008 წელს ისწავლა, – ამის შესახებ ევროკავშირის უმაღლესმა წარმომადგენელმა საგარეო საქმეთა და უსაფრთხოების საკითხებში, კაია კალასმა კოპენჰაგენის დემოკრატიის სამიტზე განაცხადა.
„უკრაინამ ეს 2014 წელს ისწავლა ყირიმის ანექსიით და ახლა უკვე რუსეთისგან სამწლიანი სრულმასშტაბიანი ომის შემდეგ. ჩვენს ხელშია პასუხი კითხვაზე, თუ როგორ შევაჩეროთ რუსეთის მიერ დემოკრატიების წინააღმდეგ აგრესიის ისტორიული ციკლი“, – აღნიშნა კალასმა.
მისი თქმით, უსაფრთხოების ყველაზე ძლიერი გარანტია ძლიერი უკრაინაა.
„კიევს არ შეუძლია კიდევ ერთი ბუდაპეშტის მემორანდუმის მიღება — მხოლოდ სიტყვები არასდროს არის საკმარისი უსაფრთხოების გარანტიისთვის. სწორედ ამიტომ არიან ევროკავშირი და მისი წევრი სახელმწიფოები უკრაინის სამხედრო ძალების უდიდესი მხარდამჭერები და ამიტომ უნდა იყოს უსაფრთხოების ძლიერი გარანტიები უკრაინაში ნებისმიერი სამშვიდობო შეთანხმების ნაწილი“, – აღნიშნა კალასმა.
მისი თქმით, როდესაც ომი დასრულდება, ის სამუდამოდ უნდა დასრულდეს.
„ამის მისაღწევად, ჩვენ ასევე უნდა გავზარდოთ ზეწოლა რუსეთზე და გავაძლიეროთ უკრაინა ბრძოლის ველზე დღესვე. რუსეთმა სანქციების შემსუბუქება მოითხოვა. ჩვენ ვიცით, რომ სანქციები მუშაობს. გასულ კვირას წარვადგინეთ სანქციების მე-17 პაკეტი. ჩვენ ასევე დავადგინეთ 2027 წელი რუსეთთან ენერგეტიკული კავშირების გაწყვეტის ბოლო ვადად. ჩვენ ახლახან გამოვყავით 1 მილიარდი ევრო უკრაინის თავდაცვის ინდუსტრიისთვის, რათა მხარი დავუჭიროთ უკრაინულ კომპანიებს და უზრუნველვყოთ დამატებითი სამხედრო დახმარება“, – აღნიშნა კალასმა.