“18 წლის გოგონა, რომელიც ტროპიკული მოგზაურობიდან გაუჩინარდა, საქართველოში ნარკოდანაშაულისთვის არის დაკავებული… ამბობს, რომ ორსულადაა” – რას წერს dailymail-ი
ბრიტანელმა სტუდენტმა, რომელიც საქართველოში 14 კილოგრამი კანაფის კონტრაბანდისთვის დააკავეს, სასამართლოს განუცხადა, რომ ორსულადაა.
საქართველოს შინაგან საქმეთა სამინისტროს ოფიციალურ განცხადებაში წერია, რომ აეროპორტში, ბრალდებულის ბარგის შემოწმებისას, მის სამგზავრო ჩანთაში, 12 კილოგრამამდე “მარიხუანა” და 2 კილოგრამი “ჰაშიში” აღმოაჩინეს. ისინი ჰერმეტულად დაფასოებულ პაკეტებში იყო გადანაწილებული.
გამოძიება სისხლის სამართლის კოდექსის 262-ე მუხლის 4-ე ნაწილის „ა“ ქვეპუნქტით, 260-ე მუხლის მე-3 ნაწილის „ა“ ქვეპუნქტით და 273 პრიმა მუხლის მე-6 ნაწილით მიმდინარეობს.
დანაშაულის დამტკიცების შემთხვევაში 18 წლის ბრიტანეთის მოქალაქეს 20 წლამდე ან უვადო პატიმრობა ელის. ახლა მას სამედიცინო შემოწმება ჩაუტარდება, სადაც ექიმები მისი განცხადებების სისწორეს დაადგენენ.
დაკავებამდე მოზარდი ფილიპინების ტროპიკულ კუნძულებზე, პალავანსა და პანაიზე ერთობოდა და TikTok-სა და Instagram- ზე გამოქვეყნებულ პოსტებში ნაღდი ფულის უზარმაზარი დასტების ფოტოებს ტვირთავდა. თუმცა, მისი ონლაინ პოსტები გასულ კვირას მოულოდნელად შეწყდა. ის ბოლოს ტაილანდში ისვენებდა. ოჯახი ფიქრობდა, რომ გოგონა მოგზაურობის დროს გაუჩინარდა.
მისმა ადვოკატმა MailOnline-ს დაუდასტურა, რომ მისი მამა, ნილ კალი, ამჟამად თბილისისკენ მიემართება. ადვოკატის თქმით, სამედიცინო ფაკულტეტის სტუდენტი, რომელიც გამოძიების მიმდინარეობისას ორთვიანი წინასწარი პატიმრობის ქვეშ იმყოფებოდა, ამჟამად “შეშინებული და დაბნეულია”.
ქვეყნის ერთ-ერთმა წამყვანმა ნარკოდანაშაულის ექსპერტმა, პოლიციის ყოფილმა გენერალმა ჯემალ ჯანაშიამ, გამოცემა dailymail-ს განუცხადა: “ის ფაქტი, რომ იგი „კრიმპოლის“ სპეციალური დავალებათა დეპარტამენტმა დააკავა, მიუთითებს, რომ ეს შემთხვევითი ჩხრეკა კი არა, დაგეგმილი ოპერაცია იყო.
“ნარკოტიკებთან დაკავშირებული დანაშაულები საქართველოს პოლიციის ერთ-ერთი მთავარი პრიორიტეტია. თეორიულად, აღმოჩენილი რაოდენობის გათვალისწინებით, მას შეიძლება სამუდამო პატიმრობა მიესაჯოს. თუმცა, პრაქტიკაში ეს სასჯელი, როგორც წესი, მკვლელებისა და ორგანიზებული დანაშაულის მაღალი რანგის წარმომადგენლებისთვისაა განკუთვნილი“ – წერს გამოცემა.
მიუხედავად ამისა, 15-დან 20 წლამდე თავისუფლების აღკვეთა საკმაოდ რეალური შესაძლებლობაა.“
კალის ქართველმა ადვოკატმა მისი გირაოთი გათავისუფლება მოითხოვა.
„ჩემი კლიენტი ამჟამად დუმილის უფლებას იყენებს, ამიტომ დეტალურ ინფორმაციას მოგვიანებით მოგაწვდით” – განაცხადა მან ჟურნალისტებთან საუბრისას.
Ambebi.ge სტატიას dailymail-ზე დაყრდნობით აქვეყნებს.