3 დღის წინ, ავტოსაგზაო შემთხვევის შედეგად მტკვარში გადავარდნილი მანქანის კიდევ ერთი მგზავრის სამძებრო ოპერაცია გრძელდება. მდინარეში ნაპოვნია 2 ადამიანის ცხედარი. გადარჩენა მხოლოდ ერთ-ერთმა მგზავრმა შეძლო.
პროკურატურამ ავტოსაგზაო შემთხვევის ფაქტზე დაკავებულ პირს ბრალდება უკვე წარუდგინა და, სავარაუდოდ, სასამართლომ დღეს მისთვის აღკვეთის ღონისძიების შეფარდებაზე უნდა იმსჯელოს. საქმე ეხება ავტომობილის მოძრაობის უსაფრთხოების ან ექსპლუატაციის წესის დარღვევას, რამაც ორი ან მეტი პირის სიცოცხლის მოსპობა გამოიწვია. დანაშაული 10 წლამდე პატიმრობას ითვალისწინებს.