მარტვილში სასწაულებრივად გადარჩენილი ბავშვის ამბავმა მთელი საქართველო გაახარა. ცნობილია, რომ 6 წლის ბავშვს ფეხი დაუცურდა (ქვემო ხუნწი) და ცხენისწყალში გადავარდა. სამძებრო სამუშაოებში მაშველებთან ერთად, მოსახლეობად ჩაერთო. ძებნა-შველის ღონისძიებაში მყისიერად ჩაერთო 50-მდე მეხანძრე-მაშველი, წყალზე სამაშველო საშუალებები და მყვინთავთა ჯგუფი, რის შედეგადაც, მდინარეში ჩავარდნის ადგილიდან 500 მეტრის მოშორებით, ნანახია ბავშვი, რომელიც ნაპირზე გამოყვანილია უვნებლად.
ამბები.ge -მ მომხდარის შესახებ, ბავშვის ბიძა ლადო თორდინავა ჩაწერა :
– დანი ახლა კარგად არის, კარგად გრძნობს თავს. ახლახან გაიღვიძა. უბრალოდ ცოტა ხელს იტკივებს, მეტი არაფერი, ალბათ ნაბრძოლი რომ არის მაგ დროს იტკინა. საავადმყოფოშიც გვყავდა, ღმერთის წყალობით ყველაფერი კარგად არის, გადავრჩით.
– როგორ მოხდა ეს შემთხვევა?
– ბავშვები ჭალაში იყვნენ, ქვევით ჩავიდა დანი, ალბათ სანახავად და დაუსრიალდა ფეხი და ჩავარდა. მასთან ერთად კიდევ ერთი ბავშვი იყო, მეზობელი. ისიც პატარა და არ შეეძლო დახმარება. რომ დაბრუნდა და გვითხრა, ყველა ერთად წავიდნენ ბავშვის მოსაძებნად. ექვსი საათი ეძებდნენ ბავშვს. ახლოს არის ეს ტერიტორია სახლთან. საშინელ მდგომარეობაში ვიყავით, ორჯერ გვაჩუქა დანის თავი ღმერთმა და ოჯახიც მეორედ დავიბადეთ.
– დანიმ გადარჩენისთვის თავადაც ძალიან ბევრი იბრძოლა?
– დიახ, არ დანებდა, იბრძოლა, მოუსვენარია თვითონაც. მართლა საოცრება მოხდა, გადავრჩით. მეტი არაფერი შემიძლია გითხრათ, გადაგვარჩინა უფალმა.
