მას [მერაბ დვალიშვილს] „სინდისის პატიმრები“ უხსენეს და ვერ გაიგო – ჩვენ დაგვიჭირეს აქციაზე, როცა ევროპულ მომავალს ვითხოვდით. ჩვენ გვინდა, რომ ჩვენი ქვეყნის მეგობარი ევროპა და ამერიკა იყოს, ის ამერიკა, რომელიც შენ ძალიან გიყვარს, – ასე მიმართა აქციების პერიოდში დაკავებულმა რეზო კიკნაძემ სასამართლო პროცესზე სიტყვით გამოსვლისას, UFC-ის ქართველ მებრძოლს, მერაბ დვალიშვილს.
როგორც რეზო კიკნაძემ მიმართვაში განაცხადა, აქციაზე დაკავებულები ისჯებიან იმის გამო, რომ არ უნდათ საქართველო რუსეთისკენ მიდიოდეს.
„მერაბ დვალიშვილს მივმართავ – მას სინდისის პატიმრები უხსენეს და ვერ გაიგო. ძალიან მოკლედ ავუხსნი, თუ რატომ ვართ აქ – ჩვენ დაგვიჭირეს აქციაზე, ევროპულ მომავალს ვითხოვდით და კობახიძემ თქვა, რომ „სანამ „ოცნება“ იქნება ხელისუფლებაში, ევროპასთან კავშირი და მოლაპარაკებები არ გვექნებაო“. ჩვენ გვინდა, რომ ჩვენი ქვეყნის მეგობარი ევროპა და ამერიკა იყოს, ის ამერიკა, რომელიც შენ ძალიან გიყვარს, არ გინდა, რომ რუსეთისკენ მივდიოდეთ. ამის გამო ვყავართ აქ და ამის გამო გვისჯიან 5, 6 და 7 წელს“, – განაცხადა რეზო კიკნაძემ.
ცნობისთვის, UFC-ის ქართველ მებრძოლს მერაბ დვალიშვილს, როდესაც მან UFC-ის საჩემპიონო ქამარი მეორედ დაიცვა, აქციების დროს დაკავებულმა რეზო კიკნაძემ გამარჯვება სასამართლო სხდომათა დარბაზიდან მიულოცა, ხოლო როცა დვალიშვილი საქართველოში ჩამოვიდა, პრესკონფერენციაზე მას ჟურნალისტებმა ჰკითხეს, მხარდაჭერის გამოსახატავად მივიდოდა თუ არა რეზო კიკნაძის პროცესზე, დვალიშვილმა უპასუხა, რომ ის სპორტსმენია და თავის საქმეს აკეთებს.”მე სპორტსმენი ვარ და ჩემს საქმეს ვაკეთებ, დარწმუნებული ვარ, რომ ბევრი კარგი ადვოკატია და თქვენც ახალგაზრდები, გააკეთებთ იმას, რაც გასაკეთებელია, რომ მაგ ახალგაზრდას დაეხმაროთ. ამხელა მისია მაქვს აღებული, რომ ვაჩვენო ჩემი საქართველო და ჩემი საქმე გავაკეთო, რაც ვიცი. ხომ იცით, “პური მეპურემ უნდა გამოაცხოსო”. ყველა პატიმარს თავისუფლებას, ჯანმრთელობასა და მხნეობას ვუსურვებ“, – განაცხადა მერაბ დვალიშვილმა.