ლიბერალებისა და დემოკრატების ალიანსი ევროპისთვის ALDE Party-ის საბჭომ საქართველოს შესახებ მიიღო რეზოლუცია სახელწოდებით – „დემოკრატია ალყაშია: მოწოდება საქართველოს ევროპული გზის დასაცავად“.
რეზოლუციაში ხაზგასმულია. ქართველი ხალხის ურყევი ერთგულება პროევროპული და დემოკრატიული მომავლის მიმართ.
ასევე, ნათქვამია, რომ „ქართული ოცნება“ სრულად არის პასუხისმგებელი დემოკრატიული უკუსვლის გამო, მათ შორის ანტიდემოკრატიული კანონმდებლობის მიღებასა და 2024 წლის გაყალბებულ არჩევნებზე, ადამიანის უფლებების დარღვევებსა და ევროკავშირში ინტეგრაციის შეჩერებით საქართველოს ევროატლანტიკური გზიდან გადახვევის გამო.
რეზოლუცია გმობს: პოლიტიკურად მოტივირებული განაჩენის გამოტანას ზურაბ გირჩი ჯაფარიძის, გიორგი ვაშაძის, ბადრი ჯაფარიძის, მამუკა ხაზარაძის, ნიკა მელიასა და გივი თარგამაძის წინააღმდეგ. ოპოზიციონერი პოლიტიკოსების ნიკა გვარამიასა და ირაკლი ოქრუაშვილის დაკავებას. ადამიანის უფლებების დარღვევას, მშვიდობიანი დემონსტრანტების წინააღმდეგ რეპრესიებს და 60-ზე მეტი აქტივისტის წინააღმდეგ სასამართლო დევნას; დეზინფორმაციულ კამპანიებს და მტრულ რიტორიკას ევროკავშირის ინსტიტუტებისა და წარმომადგენლების წინააღმდეგ; ანტიდემოკრატიული კანონების მიღებას, როგორიცაა „უცხოელი აგენტების შესახებ“ კანონი, რომლის სამიზნეს სამოქალაქო საზოგადოება, თავისუფალი პრესა და ძირითადი თავისუფლებები წარმოადგენს და„მემკვიდრე პარტიების შესახებ“ კანონი, ქართული ოცნების გარდა სხვა პარტიების წინააღმდეგ არის მიმართული და მათ არჩევნებში მონაწილეობას დე ფაქტო უკრძალავს.
რეზოლუცია მოითხოვს: ყველა პოლიტიკური პატიმრის, მათ შორის პოლიტიკური ლიდერების, ჟურნალისტებისა და მშვიდობიანი მომიტინგეების დაუყოვნებლივ და უპირობო გათავისუფლებას.
2025 წლის ბოლომდე ახალი, თავისუფალი და სამართლიანი საპარლამენტო არჩევნების ჩატარებას, რომელსაც ზედამხედველობას მიუკერძოებელი საარჩევნო ადმინისტრაცია გაუწევს. ანტიდემოკრატიული კანონმდებლობის გაუქმებას; ევროკავშირისა და ეროვნულ დონეებზე სანქციებს, სავიზო შეზღუდვებსა და ფინანსურ ზომებს ბიძინა ივანიშვილის, „ქართული ოცნების“ ოფიციალური პირების, პროპაგანდისტების, პოლიციისა და პროკურორების, კორუმპირებული მოსამართლეებისა და მათი ოჯახების წინააღმდეგ; ALDE-ს წევრმა პარტიებმა და ევროკავშირის ლიბერალმა პარტნიორებმა „ქართული ოცნების“ წარმომადგენლებთან არ უნდა ითანამშრომლონ.