ევროკავშირი უკრაინის რეკონსტრუქციისთვის 2.3 მილიარდ ევროს გამოყოფს. შესაბამის ინფორმაციას ევროკომისია ავრცელებს.
ევროკომისიის პრეზიდენტმა ურსულა ფონ დერ ლაიენმა რომში უკრაინის რეკონსტრუქციის გეგმებთან დაკავშირებულ კონფერენციაზე განაცხადა, რომ თანხები მოიცავს 1.8 მილიარდ ევროს სესხს გარანტიების სახით და 580 მილიონ ევროს გრანტებს საერთაშორისო და ორმხრივი საჯარო ფინანსური ინსტიტუტებიდან.
ფონ დერ ლაიენის თქმით, საერთო ჯამში, ის შეეცდება უკრაინაში 10 მილიარდ ევრომდე ინვესტიციის სახით მობილიზება უზრუნველყოს.
ცნობისთვის, რომში უკრაინის აღდგენის საკითხზე კონფერენცია მიმდინარეობს.
იტალიის დედაქალაქში უკრაინის აღდგენის საკითხზე კონფერენცია ორი დღის განმავლობაში, 10-11 ივლისს გაიმართება.
კონფერენციის ოფიციალურ ვებგვერდზე განთავსებული ინფორმაციის თანახმად, მონაწილეები ოთხ ძირითად საკითხზე გააკეთებენ აქცენტს, მათ შორის, უკრაინაში კერძო სექტორის მიზიდვაზე, ადამიანურ კაპიტალზე, ადგილობრივი რეგიონების აღდგენასა და ევროპულ ინტეგრაციაზე.