ქუთაისის „ტორპედოს“ მთავარმა მწვრთნელმა დირკ შუსტერმა კონფერენსლიგის პირველი საკვალიფიკაციო რაუნდის საწყის მატჩში ყაზახურ „ორდაბასთან“ მოგებული (4:3) შეხვედრა შეაფასა.
„ვფიქრობ, რამდენიმე ეპიზოდში აშკარად არ გაგვიმართლა. 1:0 ვიგებდით, მაგრამ ელემენტარული შეცდომების გამო სამწუთიან მონაკვეთში ორი გოლი გავუშვით. ამის შემდეგ გადაწყობა რთული იყო.
გვყავს რამდენიმე ფეხბურთელი, რომლებიც ბოლომდე ფიზიკურად მზად არ იყვნენ და მეორე ტაიმში ამიტომ გამოვიყვანე. კოხრეიძის და ღუდუშაურის გარეშე რთულია შეხვედრის დაწყება, რადგან მათ ძალიან კარგი ტექნიკა აქვთ.
ვფიქრობ, მეორე ტაიმი პირველზე ბევრად უკეთესად ჩავატარეთ. მაგრამ წინაა განმეორებითი შეხვედრა. ჯერ არაფერია დამთავრებული და ყაზახეთში თამაშისთვის კარგად უნდა მოვემზადოთ“, – ამბობს ქუთაისის „ტორპედოს“ მთავარი მწვრთნელი.