თბილისის საკრებულომ დედაქალაქის მთავრობის ახალი შემადგენლობა დაამტკიცა

თბილისის მუნიციპალიტეტის ახალი მთავრობა დამტკიცებულია.

საკრებულოს სხდომაზე დედაქალაქის მერის მიერ წარდგენილ მერის მოადგილეების, სამსახურის ხელმძღვანელებისა და გამგებლების კანდიდატურებს მხარი დაუჭირეს.

კახა კალაძემ საკრებულოს წევრებს სიტყვით მიმართა და საზოგადოებას არჩევნებში მხარდაჭერისთვის მადლობა კიდევ ერთხელ გადაუხადა.

„კიდევ ერთხელ მინდა, მადლობა გადაგიხადოთ თითოეულ თქვენგანს მხარდაჭერისთვის, თანადგომისთვის. ყველაფერს გავაკეთებთ იმისთვის, რომ ღირსეულად ვემსახუროთ ჩვენს ქალაქს. უამრავი გამოწვევა, პრობლემა არსებობს დედაქალაქში. მოსახლეობის უმრავლესობამ სწორედ ჩვენ გვანდო ეს მიმართულება, რომ ყველაფერს გაეცეს ღირსეული პასუხი. გვაქვს ძალიან ამბიციური გეგმები კონკრეტული პროექტების სახით. მზად ვართ, ჩემს თანაგუნდელებთან ერთად, 24-საათიან რეჟიმში, თქვენი ჩართულობით, ვემსახუროთ ჩვენს ქალაქს და თბილისელებს“, – აღნიშნა თბილისის მერმა.

დედაქალაქის საკრებულოს გადაწყვეტილებით, თბილისის ვიცე-მერი კვლავ გიორგი ტყემალაძე იქნება, ხოლო დედაქალაქის მერის მოადგილეების თანამდებობას ირაკლი ბენდელიანი, ანდრია ბასილაია და კახა აბულაძე დაიკავებენ.

თბილისის მერიის ადმინისტრაციის უფროსი – ვლადიმერ ჭიღლაძე იქნება; გარემოს დაცვის საქალაქო სამსახურის უფროსი – პაატა ტოგონიძე; ეკონომიკური განვითარების საქალაქო სამსახურის უფროსი – ვახტანგ ლომჯარია; თბილისის მუნიციპალური ინსპექციის უფროსი – გოგი ჩიქოვანი; ინფრასტრუქტურის განვითარების საქალაქო სამსახურის უფროსი – გიორგი აბუთიძე; იურიდიული საქალაქო სამსახურის უფროსი – სერგო ბირკაძე; კულტურის, განათლების, სპორტისა და ახალგაზრდულ საქმეთა საქალაქო სამსახურის უფროსი – ირაკლი გვილავა; საფინანსო საქალაქო სამსახურის უფროსი – გაიოზ თალაკვაძე; მუნიციპალური შესყიდვების საქალაქო სამსახურის უფროსი – დავით მალანია; ჯანდაცვისა და სოციალური მომსახურების საქალაქო სამსახურის უფროსი – გელა ჩივიაშვილი; უსაფრთხოების საქალაქო სამსახურის უფროსი – ნიკოლოზ ჭონქაძე.

რაც შეეხება თბილისის რაიონების გამგებლებს, ჩუღურეთის რაიონს – დავით მაქაცარია, დიდუბის რაიონს – დავით გელოვანი, გლდანის რაიონს – ბესიკ კალაძე, ვაკის რაიონს – ლევან ყიფიანი, ხოლო ისნის რაიონს აკაკი ხლაბუსტოვი უხელმძღვანელებს. კრწანისის რაიონის გამგებელი ლაშა ცაგურია იქნება, მთაწმინდის – დავით კირკიტაძე, ნაძალადევის – ირაკლი ანდღულაძე, საბურთალოს – გაიოზ ვასაძე, სამგორის რაიონის გამგებელი კი – კახა სამხარაძე.

ინფორმაციას თბილისის მერია ავრცელებს.