“სამშობლოს სიყვარულისთვის ადამიანი არ არის კრიმინალი” – პაატა მანჯგალაძე

სამშობლოს სიყვარულისთვის ადამიანი არ არის კრიმინალი – ბატონო მოსამართლე, ამას ნახავთ თქვენ პროცესის მიმდინარეობისას, რადგან აქ არავინ არის საქართველოს მტერი, – ასე მიმართა 4 ოქტომბრის საქმეზე დაკავებულმა პოლიტიკოსმა, „სტრატეგია აღმაშენებლის“ წევრმა პაატა მანჯგალაძემ მოსამართლე ირაკლი შვანგირაძეს.

მისი თქმით, პასუხისმგებლობას არ გაურბის, ხოლო ადამიანები, რომლებიც 4 ოქტომბერს აქციაზე მივიდნენ, მივიდნენ სამშობლოს სიყვარულის მოტივით.

„მეც თავიდან ვამბობდი და იმავეს ვამბობ – არ იფიქროთ, რომ პასუხისმგებლობას გავურბივარ. ამ ადამიანების უმეტესობა ახლა გავიცანი. რაც ჩვენ გვაერთიანებს არის ის, რომ იმ დღეს იქ მისული ვიყავით ქვეყნის სიყვარულისთვის. ამაში დარწმუნებული ვარ. სამშობლოს სიყვარულისთვის ადამიანი არ არის კრიმინალი. ჩვენ გვაქვს მთავარი უპირატესობა – მეტი მორალი, მეტი ზნეობა და მეტი რწმენა. ბატონო მოსამართლე, ამას ნახავთ თქვენ პროცესის მიმდინარეობისას, რადგან აქ არავინ არის საქართველოს მტერი“, – განაცხადა პაატა მანჯგალაძემ.

ცნობისთვის, მურთაზ ზოდელავას, პაატა ბურჭულაძეს და ირაკლი ნადირაძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით წარედგინათ, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მათ ასევე ბრალი წარდგენილი აქვთ სსსკ-ის 225-ე მუხლის პირველი ნაწილით, რაც ჯგუფური ძალადობის ორგანიზებასა და ხელმძღვანელობას გულისხმობს. მათ ბრალი წარდგენილი აქვთ სსსკ-ის 317-ე მუხლითაც, რაც გულისხმობს მოწოდებას საქართველოს კონსტიტუციური წყობილების ძალადობით შეცვლისკენ და სახელმწიფო ხელისუფლების დამხობისკენ, რაც სასჯელის სახედ და ზომად 9- წლამდე თავისუფლების აღკვეთას ითვალისწინებს.

ირაკლი შაიშმელაშვილს ბრალდება საქართველოს სისხლის სამართლის კოდექსის 317-ე მუხლით წარედგინა, რაც გულისხმობს საქვეყნოდ მოწოდებას საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ, რაც სასჯელის სახედ და ზომად 3- წლამდე თავისუფლების აღკვეთას ითვალისწინებს.

ლაშა ბერიძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით წარედგინა, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მას ბრალდება ასევე წარდგენილი აქვს სსსკ-ის 225-ე მუხლის პირველი ნაწილით, რაც ჯგუფური ძალადობის ორგანიზებასა და ხელმძღვანელობას გულისხმობს.

ირაკლი ჩხვირკიას, ნიკა გვენცაძეს, თორნიკე მჭედლიშვილს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით წარედგინა, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მას ასევე ბრალი წარდგენილი აქვს სსსკ-ის 225-ე მუხლის პირველი ნაწილით, რაც ჯგუფური ძალადობის ორგანიზებასა და ხელმძღვანელობას გულისხმობს. აღნიშნული ქმედება სასჯელის ზომად 6-დან 9- წლამდე თავისუფლების აღკვეთას ითვალისწინებს.

გური ჟვანიას ბრალდება სსსკ-ის 225-ე მუხლის მეორე ნაწილით აქვს წარდგენილი, რაც ჯგუფურ ძალადობაში მონაწილეობას გულისხმობს.

პაატა მანჯგალაძეს ბრალდება სსსკ-ის 225-ე მუხლის პირველი ნაწილით წარედგინა, რაც ჯგუფური ძალადობის ორგანიზებას გულისხმობს. აღნიშნული ქმედება სასჯელის სახედ და ზომად 6-დან 9- წლამდე თავისუფლების აღკვეთას ითვალისწინებს.