ბავშვები წყალტუბოს საბავშვო ბაღშიც მოიწამლნენ

ბავშვები წყალტუბოს საბავშვო ბაღშიც მოიწამლნენ .ამის შესახებ ერთ-ერთი მცირეწლოვანი აღსაზრდელის მშობელი მთავარს უყვება

“წყალტუბოს #4 საბავშვო ბაღშიც დაფიქსირდა ათზე მეტი ბავშვის პირღებინება და მუცლის ტკივილი” – მოგვწერა მან ანონიმურობის დაცვის პირობით. ქალის თქმით, მის შვილსაც იგივე სიმპტომები – ღებინება და მუცლის ტკივილი – აღენიშნებოდა, რაც კლინიკებში გადაყვანილ დანარჩენ მცირეწლოვანებს

დღეს მთავარს თბილისის რამდენიმე საჯარო საბავშვო ბაღის მშობლებმა ბავშვების მასობრივი ინტოქსიკაციის შესახებ აცნობეს. როგორც ისინი გვიყვებოდნენ, გვიან ღამით საავადმყოფოებში მოზარდები პირღებინებითა და მუცლის ტკივილით შეიყვანეს. მათივე ინფორმაციით, რამდენიმე ბაღი დღეს დილიდან დაიკეტა. მშობლებს არ აქვთ პასუხი, რას შეიძლება გამოეწვია ბავშვების სავარაუდო მოწამვლა. მათივე ინფორმაციით, მოწამლულია 20-ზე მეტი ბავშვი. რაც შეეხება ბაღებს, საიდანაც ბავშვები სხვადასხვა საავადმყოფოებში გადაიყვანეს, როგორც მშობლები ამბობენ, მათ შორისაა, თბილისის 109-ე, 124 -ე, 46 -ე, 121-ე, 79-ე, 22-ე, 59-ე საბავშვო ბაღები. მთავარის ინფორმაციით, ბავშვები მარნეულის საბავშვო ბაღშიც მოიწამლნენ. ერთ-ერთი ადგილობრივი მშობელი გვიყვება, რომ მარნეულის მესამე საჯარო ბაღის ერთ-ერთ ჯგუფში ბავშვების მასობრივი ინტოქსიკაციის შემთხვევა 2 დღის წინ გამოვლინდა. ბავშვებს პირღებინება და მუცლის ტკივილი აღენიშნებოდათ. მშობლის ინფორმაციით, ბავშვებს გადასხმები დასჭირდათ. მისივე ცნობით, მოწამლულია დაახლოებით 10-12 ბავშვი. მცირეწლოვანების ნაწილი ამ დრომდე კლინიკაში რჩება

ამ ინფორმაციის გავრცელების შემდეგ განცხადება გაავრცელა ფინანსთა სამინისტროს საგამოძიებო სამსახურმა – უწყებამ ბაგა-ბაღებში ინტოქსიკაციის ფაქტზე გამოძიება დაიწყო. როგორც მათ მიერ გავრცელებულ ინფორმაციაშია ნათქვამი, “თბილისში მდებარე 20 ბაგა-ბაღის 55 აღსაზრდელსა და 1 აღმზრდელს ინტოქსიკაციის ნიშნები აღენიშნება”