რუსეთმა შესაძლოა 1 ნოემბრიდან სომხეთს ბუნებრივი აირის მიწოდება სრულად შეუწყვიტოს, თუ ერევნის მთავრობა მოსკოვის მიერ წამოყენებულ რამდენიმე პოლიტიკურ მოთხოვნას არ შეასრულებს. – ამის შესახებ ინფორმაციას სომხური გამოცემა Hraparak ავრცელებს, რომელიც ეყრდნობა საკუთარ წყაროებს რუსეთში.
ციტირებული წყაროების ცნობით, 1 ნოემბრის შემდეგ შესაძლოა მოხდეს „მსხვილი ავარია“ ან სხვა ფორსმაჟორული შემთხვევა, რაც რუსული გაზის მიწოდების აღდგენას შეაფერხებს. ამავდროულად, წყაროები ამტკიცებენ, რომ მოსკოვმა სომხეთის პრემიერ-მინისტრ ნიკოლ ფაშინიანს ამ სცენარის თავიდან ასაცილებლად ოთხი კონკრეტული მოთხოვნა წარუდგინა: პირველი პირობა სომხეთში რუსეთის 102-ე სამხედრო ბაზის ყოფნას ეხება – მოსკოვი ითხოვს, რომ ფაშინიანმა თავი შეიკავოს მისი განლაგების საკითხზე დისკუსიების წამოწყებისგან; მეორე მოთხოვნა რუსული საკუთრების აქტივებს ეხება, მათ შორის ეროვნულ რკინიგზის ქსელსა და „გაზპრომს“. სომხეთის ხელისუფლებამ უნდა შეწყვიტოს ამ აქტივებთან დაკავშირებული ნებისმიერი ქმედება, რაც მოსკოვის მიერ შესაძლოა აღქმული იყოს როგორც რუსულ კაპიტალზე ხელყოფა; მესამე პირობა საგარეო პოლიტიკურ კურსს ეხება, კერძოდ, არჩევანს ევრაზიულ ეკონომიკურ კავშირსა და ევროკავშირს შორის. ცნობების თანახმად, მოსკოვი ერევნისგან ითხოვს, ან გააუქმოს კანონი „ევროკავშირში სომხეთის რესპუბლიკის გაწევრიანების პროცესის დაწყების შესახებ“, ან დანიშნოს კონკრეტული თარიღი ამ საკითხზე საყოველთაო რეფერენდუმის ჩასატარებლად; მეოთხე მოთხოვნა პრორუსი პოლიტიკური მოღვაწეების დევნის შეწყვეტას ითვალისწინებს, კერძოდ, საუბარია რობერტ ქოჩარიანზე, გაგიკ წარუკიანზე, ანდრანიკ თევანიანსა და სამველ კარაპეტიანზე.
გარდა ამისა, Hraparak-ის წყაროები ასახელებენ კიდევ ერთ მოთხოვნას: სომხეთის მთავრობაში მისაღები ვიცე-პრემიერის დანიშვნას, რომელთანაც რუსი ოფიციალური პირები პირდაპირ კოორდინაციას შეძლებენ.კრემლის მხრიდან სომხეთზე ეკონომიკური ზეწოლა მოჰყვა დიპლომატიურ დავათა სერიას, რომელიც სომხეთის დასავლურ კურსს უკავშირდება. პრემიერ-მინისტრმა ნიკოლ ფაშინიანმა მანამდე უარი თქვა 28-29 მაისს გამართულ ევრაზიული ეკონომიკური კავშირის სამიტზე დასწრებაზე 7 ივნისის საპარლამენტო კამპანიის მიზეზით.
საპასუხოდ, რუსეთის ლიდერმა ვლადიმერ პუტინმა სომხეთს შესთავაზა რეფერენდუმის ჩატარება მოსკოვის მეთაურობით არსებული სავაჭრო ბლოკიდან გამოსვლისა და ევროკავშირის წევრობისკენ სწრაფვის შესახებ, რასაც მან პოტენციური „ურთიერთხელსაყრელი განქორწინება“ უწოდა.
ფაშინიანმა ეს ფორმულირება უარყო და განაცხადა, რომ სომხეთი სახელმწიფოთაშორისი ლოგიკით მოქმედებს და გააგრძელებს საკანონმდებლო ცვლილებების გატარებას ევროკავშირთან ურთიერთობების გასაღრმავებლად, ევრაზიული ეკონომიკური კავშირის წინაშე არსებული მიმდინარე ვალდებულებების პარალელურად.
Discussion about this post