ვენეციის კომისია საქართველოს პარლამენტის მიერ მიღებულ ე.წ. გრანტების კანონზე სამართლებრივ დასკვნას აქვეყნებს. დასკვნის მიხედვით, კანონმდებლობა არ ემსახურება საქართველოს სუვერენიტეტის გაძლიერების მიზანს.
“ვენეციის კომისია მტკიცედ მიიჩნევს, რომ განსახილველი კანონმდებლობა არ ემსახურება საქართველოს სუვერენიტეტისა და პოლიტიკური პარტიების უცხოური გავლენისა და გარე ჩარევისგან დაცვისა და გაძლიერების მიზანს. ის უფრო მეტად აწესებს არაპროპორციულ და არასაჭირო შეზღუდვებს საქართველოს მოქალაქეების ფუნდამენტურ უფლებებსა და პოლიტიკურ თავისუფლებებზე, განსაკუთრებით გაერთიანებისა და გამოხატვის თავისუფლებასთან დაკავშირებით და ხელს უშლის პოლიტიკური ოპოზიციის ჩამოყალიბებასა და არსებობას – განსაკუთრებით 2026 წლის 4 მარტის საკანონმდებლო ჩარჩოს მთლიანობაში კუმულაციური და სისტემური გავლენის გათვალისწინებით, მათ შორის იმ ბოლოდროინდელი ცვლილებებისა, რომლებიც შეფასდა ვენეციის კომისიის დასკვნაში „მოქალაქეთა პოლიტიკური გაერთიანებების შესახებ“ ორგანულ კანონსა და მასთან დაკავშირებულ კანონებში 2025 წლის 16 ოქტომბრის ცვლილებების თაობაზე” | ვკითხულობთ ვენეციის კომისიის დასკვნაში.
ამავე დოკუმენტის მიხედვით, აღნიშნული კანონმდებლობა “ეწინააღმდეგება პლურალიზმისა და დემოკრატიის საერთაშორისო სტანდარტებს”.
💬 “ეს კანონმდებლობა ეწინააღმდეგება პლურალიზმისა და დემოკრატიის საერთაშორისო სტანდარტებს. საქართველოს სუვერენიტეტის, კონსტიტუციური სისტემისა და პოლიტიკური პარტიების უცხოური გავლენისა და გარე ჩარევისგან დაცვის ნაცვლად, აღნიშნული კანონმდებლობა მათ ღრმად შერყევის რისკს შეიცავს. ვენეციის კომისია გამოხატავს სინანულს, რომ საქართველოს ხელისუფლებამ არ მოისურვა მასთან თანამშრომლობა ამ დასკვნის მომზადების პროცესში, თუმცა რჩება დიალოგისთვის ღია. ვენეციის კომისია რჩება საპარლამენტო ასამბლეის განკარგულებაში ამ საკითხთან დაკავშირებით შემდგომი დახმარების აღმოსაჩენად” -წერია დოკუმენტში.
Discussion about this post