რამდენიმეთვიანი გაძვირების შემდეგ მთავრობას ნოემბერში საწვავი 20-დან 28 თეთრამდე გაუიაფდა

რამდენიმეთვიანი გაძვირების შემდეგ მთავრობას ნოემბერში საწვავი 20-დან 28 თეთრამდე გაუიაფდა . ინფორმაციას გამოცემა ბიზნესპრესნიუსი სახელმწიფო შესყიდვების სააგენტოზე გამოქვეყნებული კონსოლიდირებული ტენდერის შედეგებზე დაყრდნობით ავრცელებს და წერს, რომ როგორც ოქტომბერში გაფორმებული ხელშეკრულებიდან ჩანს, მთავრობას ნოემბერში (ოქტომბერთან შედარებით), 1 ლიტრი სუპერის და პრემიუმის ტიპის ბენზინი, რეგულარი 27-28 თეთრით, ხოლო დიზელი – 20 თეთრით ნაკლები დაუჯდება

მათივე ცნობით, კონსოლიდირებული ტენდერის თანახმად, მთავრობა 1 ლიტრ სუპერის (ოქტანობა არანაკლებ 98) ტიპის საწვავს ნოემბერში 3.66 ლარად შეიძენს (ოქტომბერში 3.94 ლარი). ტენდერში გამარჯვებული „ვისოლ პეტროლიუმ ჯორჯიაა“. რაც შეეხება საწვავის სხვა ტიპებს, კონსოლიდირებული ტენდერის მიხედვით, 1 ლიტრი პრემიუმის ტიპის საწვავის ღირებულება ნოემბერში 3.36 ლარი იქნება (ოქტომბერში – 3.63 ლარი იყო), აქ გამარჯვებული „რომპეტროლ საქართველოა“. ამავე მონაცემების მიხედვით, ევრო რეგულარის ტიპის საწვავს, მთავრობა ნოემბერში 3.33 ლარად შეიძენს (ოქტომბერში 3.60 ლარი იყო) გამარჯვებულ კომპანიას „სოკარ ჯორჯია პეტროლიუმი“ წარმოადგენს. რაც შეეხება ევროდიზელს (არაუმეტეს PPM 10), ფასი არსებულ მდგომარეობაში ერთ ლიტრზე 4.29 ლარია, (ოქტომბერში 4.49 ლარი იყო), ტენდერში გამარჯვებული „სან პეტროლიუმ ჯორჯიაა“