NASA-ს ასტრონავტები – სუნი უილიამსი და ბუჩ უილმორი, რომლებიც საერთაშორისო კოსმოსურ სადგურზე (ISS) 9 თვის განმავლობაში იმყოფებოდნენ, დედამიწისკენ მოემართებიან.
SpaxeX-ის Dragon კაფსულამ კოსმოსური სადგური აშშ-ს დროით ღამის 01:05 საათზე დატოვა. ფლორიდას სანაპიროსთან ასტრონავტები სადგურის დატოვების დროიდან 17 საათში, 18 მარტის შუადღეს დაეშვებიან.
უილიამსი და უილმორი საერთაშორისო კოსმოსურ სადგურზე გასული წლის ივნისში გაგზავნეს. მათი მისია 8 დღეში უნდა დასრულებულიყო და ასტრონავტები დედამიწაზე უნდა დაბრუნებულიყვნენ. თუმცა, კაფსულას – Boeing Starliner – პრობლემები შეექმნა, რის გამოც უილიამსისა და უილმორის მისია 9 თვით, 2025 წლის მარტამდე გახანგრძლივდა.
ასტრონავტების დაბრუნების დაგეგმილი მისიებისთვის NASA-მ კონტრაქტი SpaceX-სთან გააფორმა. მათი ჩამოყვანა სწორედ მარტში ან აპრილში იყო დაგეგმილი.
უილიამსი და უილმორი დედამიწისკენ კიდევ 2 ასტრონავტთან, NASA-ს ნიკ ჰეიგთან და რუსეთის Roscosmos-ის ალექსანდრ გორბუნოვთან ერთად გამოემგზავრნენ.
ჰეიგი და გორბუნოვი კოსმოსურ სადგურზე გასული წლის სექტემბერში, SpaceX-ის Dragon კაფსულით დაეშვნენ. ამ მისიაზე 4 ასტრონავტი უნდა ყოფილიყო, თუმცა NASA-ს გადაწყვეტილებით, მხოლოდ 2 გაფრინდა და კაფსულაში 2 ადგილი უილიამსისა და უილმორისთვის გადაინახა.
ოთხ ასტრონავტს საერთაშორისო კოსმოსური სადგურის დატოვება არ შეეძლო მანამ, სანამ მათ სხვა ოთხი ასტრონავტი არ ჩაანაცვლებდა.
გასულ პარასკევს, 14 მარტს ფლორიდის კენედის კოსმოსური ცენტრიდან საერთაშორისო კოსმოსურ სადგურში NASA-ს ორი ამერიკელი ასტრონავტი – ან მაკკლეინი და ნიკოლ აიერსი, იაპონელი ასტრონავტი ტაკუია ონიში და რუსი კოსმონავტი კირილ პესკოვი გაფრინდნენ.