ქუთაისის ყოფილი მერი იოსებ ხახალეიშვილი ქალაქ კრაკოვში საქართველოს გენერალურ საკონსულოს უხელმძღვანელებს.
“საქართველოს გენერალური საკონსულოს გახსნა პოლონეთში, არის ქართველი და პოლონელი ხალხის ისტორიული თანამშრომლობის წარმატებული შედეგი და მომავალი ურთიერთობების კიდევ უფრო გაძლიერების ძალიან კარგი შესაძლებლობა. მადლობა პოლონურ მხარეს ამ საქმის მხარდაჭერისათვის.
იწყება ჩემი, პირველი, საერთაშორისო როტაცია ჩემთვის მართლაც გამორჩეულ ქვეყანაში.
წინ ბევრი გამომწვევებია და დარწმუნებული ვარ, რომ ერთობლივი ძალისხმევით ყველაფერს შევძლებთ!
ვემსახურები საქართველოს!” – წერს სოციალურ ქსელში იოსებ ხახალეიშვილი.
საგარეო საქმეთა სამინისტროს ინფორმაციით, გენერალური საკონსულოს გახსნისთვის საჭირო პროცედურები პოლონურ მხარესთან თანამშრომლობით მიმდინარე წლის 11 თებერვალს დასრულდა. იოსებ ხახალეიშვილი საქმიანობას მომავალი კვირიდან შეუდგება.
გენერალური საკონსულო დაფარავს შემდეგ ოლქებს: ლუბესკიე, მალოპოლსკი, პოდკარპაცკი, შვიეტოკშისკი. გენერალური საკონსულო ქალაქ კრაკოვში იქნება განთავსებული და გახსნის ოფიციალური ცერემონია უახლოეს მომავალში გაიმართება.
გენერალური საკონსულო მომსახურებას გაუწევს ზემოაღნიშნულ საკონსულო ოლქში მყოფ საქართველოს მოქალაქეებს.
იოსებ ხახალეიშვილი ქუთაისის მერად 2021 წლის 30 ოქტომბრის ადგილობრივი თვითმმართველობის არჩევნების შედეგად აირჩიეს. მას უფლებამოსილების ვადა 2025 წელს ეწურებოდა, თუმცა თანამდებობა 2024 წლის 15 ივლისს დატოვა.