იტალიაში, ტურინში, ტურისტული ავტობუსი მდინარე პო-ში ჩავარდა. დაიღუპა ერთი პირი. იტალიური მედიის ცნობით, გარდაცვლილი ავტობუსის მძღოლია, რომელიც სატრანსპორტო საშუალებაში მარტო იმყოფებოდა.
მაშველებმა მამაკაცი ავტობუსიდან უგონო მდგომარეობაში გამოიყვანეს. სასწრაფო დახმარების ექიმებმა მისი რეანიმირება ვერ შეძლეს და გარდაცვალება დაადასტურეს.
მედიის ინფორმაციით, ავტობუსი მდინარეში ვიტორიო ვენეტოს მოედანთან, ვიტორიო ემანუელ I ხიდიდან გადავარდა.
საქმესთან დაკავშირებით დაწყებულია გამოძიება. ფაქტის ამსახველი ვიდეოკადრები მედიაში გავრცელდა.