დიდი ბრიტანეთის საგარეო დაზვერვის, მსოფლიოში MI6-ის სახელით ცნობილი სამსახურის უფროსად, ქართული წარმოშობის 47 წლის ბლეიზ მეტრეველი დაინიშნა. მეტრეველი პირველი ქალია, რომელიც ბრიტანეთის საგარეო დაზვერვას უხელმძღვანელებს.
ინფორმაცია MI6-ის უფროსად ბლეიზ მეტრეველის დანიშვნის შესახებ 15 ივნისს გამოქვეყნდა დიდი ბრიტანეთის მთავრობის საიტზე. პრემიერ-მინისტრმა კირ სტარმერმა განაცხადა, რომ მეტრეველის “ისტორიული დანიშვნა” მოხდა იმ დროს, როცა სადაზვერვო სამსახურების მუშაობა მნიშვნელოვანია, როგორც არასდროს.
“ბლეიზ მეტრეველის ისტორიული დანიშვნა იმ დროს ხდება, როდესაც ჩვენი სადაზვერვო სამსახურების მუშაობა არასდროს ყოფილა ასეთი მნიშვნელოვანი. დიდი ბრიტანეთი უპრეცედენტო მასშტაბის საფრთხეების წინაშე დგას, იქნება ეს აგრესორებისგან, რომლებიც ჩვენს წყლებში ჯაშუშურ გემებს გზავნიან თუ ჰაკერებისგან, რომელთა დახვეწილი კიბერგეგმები ჩვენი საჯარო სერვისების ჩაშლას ისახავს მიზნად“, – განაცხადა მან.
- ბლეზ მეტრეველი, კარიერული დაზვერვის ოფიცერია, რომელიც სამსახურს 1999 წელს შეუერთდა. ის სერ რიჩარდ მურს დაზვერვის უფროსის თანამდებობაზე ოქტომბერში შეცვლის და დაზვერვის სამსახურის მე-18 უფროსი გახდება. მისი პროფესიული კარიერის დიდი ნაწილი უკავშირდება ოპერატიულ მუშაობას ახლო აღმოსავლეთსა და ევროპაში.
47 წლის მეტრეველი ამჟამად MI6-ის Q დეპარტამენტის გენერალური დირექტორია, რომელიც ტექნოლოგიებსა და ინოვაციებზეა პასუხისმგებელი. მანამდე კი შიდა უსაფრთხოებისა და კონტრდაზვერვის სააგენტოში, დირექტორის დონის სხვა თანამდებობებს იკავებდა.
მედიის ინფორმაციით, მეტრეველს განათლება კემბრიჯის უნივერსიტეტის პემბუკის კოლეჯში აქვს მიღებული. ის ანთროპოლოგიას სწავლობდა.
მის შესახებ ბევრი არაფერია ცნობილი. იძებნება მისი ერთადერთი ინტერვიუ, რომელიც მეტრეველმა სამი წლის წინ Financial Times-ს მისცა (ის სტატიაში ანონიმურად არის მოხსენიებული, ფსევდონიმით – “ადა“).
“ინტერვიუსი მეტრეველმა აღიარა, რომ ბავშვობაშიც კი, ჯაშუშობა იყო ერთადერთი სამსახური, რაზეც ოცნებობდა,“ – წერს გამოცემა.
ის გასულ წელს წმინდა მიქაელისა და წმინდა გიორგის ორდენის რაინდ-კომანდორად დაინიშნა.
ახლახან ახალი თანამდებობის შეთავაზების შემდეგ კი განაცხადა:
“ვამაყობ იმით, რომ ბრიტანეთის საგარეო დაზვერვის ხელმძღვანელობა შემომთავაზეს. MI6 სასიცოცხლოდ მნიშვნელოვან როლს ასრულებს – MI5-თან და GCHQ-თან ერთად, ბრიტანელი ხალხის უსაფრთხოების უზრუნველყოფასა და საზღვრებს გარეთ, დიდი ბრიტანეთის ინტერესების წინ წამოწევაში. მოუთმენლად ველი ამ სამუშაოს გაგრძელებას MI6-ის მამაც ოფიცრებთან, აგენტებთან და ჩვენს მრავალ საერთაშორისო პარტნიორთან ერთად“.
აღსანიშნავია, რომ 1909 წელს, დაარსების დღიდან, MI6-ს არასდროს ჰყოლია ქალი ხელმძღვანელი.
-
Financial Times წერს, რომ 47 წლის ბლეიზ მეტრეველის გვარი ქართულია, იგი შესანიშნავად ფლობს არაბულ ენას და სიღრმისეული გამოცდილება აქვს მიღებული ახლო აღმოსავლეთში, მათ შორის კონფლიქტის ზონებშიც
მეტრეველის თქმით, მისი პირველი სამსახური იყო შესაძლებლობა, შეესწავლა ბირთვული ტექნოლოგიების “ძალიან ღრმა მეცნიერება“.
ბლეიზ მეტრეველის მამის კონსტანტინე მეტრეველის შესახებ ცნობილია, რომ ის იყო ბრიტანეთის არმიის სამედიცინო დანაყოფის რადიოლოგისტად, გამოცემული აქვს მრავალი სამეცნიერო ნაშრომი რადიოლოგიის შესახებ, ხოლო 1986-2001 წლებში იკავებდა სამედიცინო გამოსახულებისა და ინტერვენციული რადიოლოგიის დეპარტამენტის ფაკულტეტის ხელმძღვანელის პოსტს ჰონგ-კონგის სამედიცინო უნივერსიტეტში.
2018 წელს ჰონგ-კონგის მედია www.scmp.com-მა მის შესახებ დაწერა, რომ 75 წლის ასაკში ის იყო უხუცესი მორბენალი, რომელმაც ჰონგ-კონგის 100-კილომეტრიანი მარათონი გაირბინა.