საქართველოს პროკურატურამ საგარეჯოს მუნიციპალიტეტში მომხდარი ჯგუფური ძალადობის ორგანიზებისთვის, მასში მონაწილეობის და დანაშაულის შეუტყობინებლობისთვის რვა პირს ბრალდება წარუდგინა.
შინაგან საქმეთა სამინისტროს მიერ ჩატარებული გამოძიებით დადგინდა, რომ 28 ივნისს, საგარეჯოს მუნიციპალიტეტის სოფელ კაკაბეთში, წარსულში მომხდარი უთანხმოების გამო ბრალდებულებმა დაპირისპირებულ მხარესთან შეხვედრა მოაწყვეს, რა დროსაც ფიზიკურად იძალადეს დაზარალებულზე და მის დასახმარებლად მისულ მამაზე. დაპირისპირების დროს ერთ-ერთმა პირმა ცეცხლსასროლი იარაღიდან გასროლის შედეგად დაზარალებულს ჭრილობები მიაყენა. მომხდარის შემდეგ ბრალდებულები შემთხვევის ადგილიდან მიიმალნენ.
გამოძიებით ასევე დადგინდა, რომ დანაშაულის ჩადენისას შემთხვევის ადგილზე მყოფმა ერთ-ერთმა ბრალდებულმა იცოდა, რომ ჩადენილი იყო მძიმე დანაშაული, თუმცა მომხდარის შესახებ სამართალდამცავ ორგანოებს არ შეატყობინა.
ერთ პირს ბრალდება საქართველოს სისხლის სამართლის კოდექსის 225-ე მუხლის პირველი ნაწილით (ჯგუფური ძალადობის ორგანიზება) წარედგინა. ექვს პირს ბრალდება 225-ე მუხლის მეორე ნაწილით (ჯგუფურ ძალადობაში მონაწილეობა), ხოლო ერთ პირს 376-ე მუხლის პირველი ნაწილით (მძიმე დანაშაულის შეუტყობინებლობა) წარედგინა, რაც სასჯელის სახედ და ზომად 9 წლამდე თავისუფლების აღკვეთას ითვალისწინებს.
პროკურატურის შუამდგომლობის საფუძველზე რვავე ბრალდებულს აღკვეთის ღონისძიების სახით პატიმრობა შეეფარდა.
შინაგან საქმეთა სამინისტროში გამოძიება გრძელდება დანაშაულში მონაწილე სხვა პირების დადგენის და მხილების მიზნით.
ინფორმაციას საქართველოს პროკურატურა ავრცელებს.