უეფა-ს კონფერენსლიგის პირველი საკვალიფიკაციო ეტაპის პირველ შეხვედრაში ქუთაისის „ტორპედომ“ ყაზახურ „ორდაბასს“ უმასპინძლა და მიუხედავად იმისა, რომ ორჯერ აგებდა, ბოლო წუთებზე გატანილი გოლით 4:3 გაიმარჯვა.
დირკ შუსტერის გუნდმა თამაში შესანიშნავად დაიწყო და 30-ე წუთზე დაწინაურდა — სწრაფი კონტრშეტევა ფელიპე პირესმა ბიორნ იონსენს გაუგრძელა, რომელმაც ზუსტად დაარტყა.
ქუთაისელთა დაცვის შეცდომით „ორდაბასის“ ქართველმა ლეგიონერმა, ლუკა იმნაძემ (35) ისარგებლა.
შესვენებამდე, 45+2-ე წუთზე, ქუთაისელთა ახალწვეულმა მატეი სიმიჩმა ანგარიში გაათანაბრა. 68-ე წუთზე „ორდაბასი“ კვლავ წინ გავიდა — კუთხურის გათამაშების შემდეგ „ტორპედოს“ დაცვამ კარის წინ უყურადღებოდ დატოვა უკრაინელი ნახევარმცველი ვლადისლავ ნაუმეცი, რომელმაც ზუსტად დაარტყა და ანგარიში 2:3 გახდა.
ქუთაისელებმა ამის შემდეგ დიდი ძალებით შეუტიეს, 79-ე წუთზე პაატა ღუდუშაურის წამოწყებული და ფელიპე პირესის განვითარებული იერიში ბიორნ იონსენმა დააგვირგვინა, ხოლო 90+4-ე წუთზე მატეი სიმიჩმაც დუბლი შეასრულა და „ტორპედოს“ გამარჯვება მოუტანა.
საპასუხო შეხვედრას ქუთაისის „ტორპედო“ „ორდაბასთან“ 17 ივლისს ყაზახეთში გამართავს.