დასავლეთ საქართველოში თხილის პლანტაციებს ბოლომდე დაუდგენელი ბაქტერიული დაავადება ახმობს. როგორც თხილის მწარმოებელთა ასოციაციის აღმასრულებელი საბჭოს თავმჯდომარე მერაბ ჭითანავა აცხადებს, სავარაუდო მიზეზი ბაქტერია “ფსევდომონაა”, რომლით ინფიცირებული ბაღების მოცულობა ამ დროისთვის 7 000 ჰა-ს აღწევს. დაავადება განსაკუთრებით გურიასა და სამეგრელოშია გავრცელებული.
როგორც ასოციაციაში აცხადებენ, მასთან ბრძოლისთვის ბაღების ოთხჯერ შეწამვლაა საჭირო, ხარჯი ჰა-ზე კი 1300-1500 ლარს აღწევს.
„პირველად 5 წლის წინ მოვახდინეთ ამ დაავადების იდენტიფიკაცია, ეს გამოიხატება ბუჩქების უეცარი ხმობით. ივლისიდან იწყება ფოთლების გაყვითლება და 10 დღეში მთლიანად ხმება. შარშან ჩემს მაგალითზე 20% გახმა, წელს უკვე ეს მაჩვენებელი 50%-მდე გაიზარდა. სწრაფად ვითარდება, განსაკუთრებით კი მაშინ, თუ გაისხლა ან ნიადაგი დამუშავდა.
გურიაში ბევრად უფრო მწვავედ არის გავრცელებული ვიდრე სამეგრელოში, თუმცა პრობლემა ძირითადად ამ ორ რეგიონში ვრცელდება.
იტალიელი და თურქი ექსპერტები ჩამოვიყვანეთ სამინისტროსთან თანამშრომლობით, იმდენად სწრაფად ხმება მცენარე, რომ ამ პროცესში სხვა დაავადებაც უჩნდება და ძნელია მიზეზის იდენტიფიცირება, მაგრამ ერთობლივად მივედით დასკვნამდე, რომ ეს არის “ფსევდომონა,” ბაქტერია რომელიც საკმაოდ რთულია. შეჩერება შესაძლებელია სპილენძის მინარევების დამუშავებით წელიწადში 4-ჯერ, ნოემბერ-დეკემბერში და ასევე გაზაფხულზე 2-ჯერ შეწამვლით. ყველა პროცედურას 1 300 ლარის აგროქიმიკატი სჭირდება 1 ჰაზე, რაც ფერმერისთვის რთული გადასახდელია.
რადგან უკვე გვაქვს ეს ინფორმაცია, წარვადგინეთ პროექტი, გავაგზავნეთ და შევთავაზეთ გადაწყვეტა, რომელიც ჩვენი პრაქტიკით შესაძლებელია. ახლა ვართ მოლაპარაკების პროცესში და იმედი გვაქვს, რომ დახმარების მექანიზმი ამოქმედდება. პრობლემა რთულია და ვადებიც შემცირებულია,“ – განაცხადა „საქმიანი დილის“ ეთერში მერაბ ჭითანავამ.
www.bm.ge
Discussion about this post