ბიზნესმენ მამუკა წერეთლის ყოფილი ცოლისა და 19 წლის შვილის მკვლელობაში ბრალდებულ თეიმურაზ გოგიაშვილს პატიმრობა შეეფარდა . გამოცემა Важные истории-ის ინფორმაციით, ის სეპარატისტულ ბატალიონ „სპარტას“ ყოფილი მებრძოლია და ის ე.წ. დონეცკის სახალხო რესპუბლიკის საველე მეთაურ არსენ პავლოვთან, მეტსახელად “მოტოროლასთან” ერთად იბრძოდა
გამოცემა ასევე წერს, რომ დონბასის ომის პირველი ფაზის დროს გოგიაშვილი დაქორწინებული იყო ე.წ. „დონეცკის სახალხო რესპუბლიკის იუსტიციის მინისტრზე“. ომის შემდეგ, გაჟონილი მონაცემების მიხედვით, იგი 2019 წლიდან 2021 წლამდე მუშაობდა რუსულ სამთავრობო-პროპაგანდისტულ მედია “Россия сегодня” -შიც. 2021 წელს კი გამარტივებული წესით მიიღო რუსეთის ფედერაციის მოქალაქეობა. მას შემდეგ მისი ლეგალური საქმიანობის შესახებ თითქმის არაფერია ცნობილი. იგი ძირითადად მოსკოვში ცხოვრობდა, თუმცა სრულმასშტაბიანი ომის დაწყების შემდეგ რეგულარულად კვეთდა საზღვარს უკრაინის ოკუპირებულ დონეცკისა და ლუგანსკის ოლქებში. თეიმურაზ გოგიაშვილი ფიტნეს-ტრენერია და ასევე ავტომანქანების ნაწილების გაყიდვებისა და ტექმომსახურების სფეროში ინდმეწარმედ არის რეგისტრირებული.
53 წლის ელენა წერეთელი და 19 წლის დარია წერეთელი 3 ოქტომბერს მოკლეს. ქალის ცხედარი მისივე სახლის აივანზე იპოვეს, გოგონასი კი – ავტოფარეხში. „მან ორივე მკვლელობა აღიარა. თქვა, რომ ჯერ გოგონა ავტოფარეხში მოკლა, შემდეგ კი მისი დედა… აღმოაჩინეს იარაღისა და საბრძოლო მასალის სამალავი” – წერს რუსული მედია სამართალდამცავ წყაროზე დაყრდნობით. გავრცელებული ინფორმაციით, გოგიაშვილი ელენა წერეთლის პარტნიორი იყო, მკვლელობის მოტივი კი მათ შორის ფინანსური უთანხმოება გახდა. გოგიაშვილი ქალაქ ვორონეჟში, 40 წლის ქალთან ერთად დააკავეს. ჯერჯერობით უცნობია, იყო თუ არა ქალი დანაშაულის თანამონაწილე.
Discussion about this post