რუსეთის არმიამ სექტემბერში, დაღუპულთა და დაჭრილთა სახით, 50 ათასზე მეტი სამხედრო დაკარგა, მათ შორის 28 ათასამდე – უშუალოდ დაღუპულია. ამავე პერიოდში, უკრაინის არმიის დანაკარგმა, დაღუპულთა და დაჭრილთა სახით, დაახლოებით 5 ათასი ადამიანი შეადგინა. ამრიგად, სექტემბერში რუსეთის დანაკარგები უკრაინისაზე 10-ჯერ მეტი იყო | წერს გამოცემა Bloomberg-ი NATO-ს მაღალჩინოსან სამხედრო წარმომადგენელზე დაყრდნობით.
გამოცემის ცნობით, ეს მაჩვენებელი საგრძნობლად აღემატება ყოველთვიური დანაკარგების იმ შეფასებებს, რომლებსაც ალიანსის ხელმძღვანელობა გაზაფხულსა და ზაფხულის დასაწყისში ასახელებდა.
Bloomberg-ის წყაროს ცნობით, რუსი სამხედროები აგრძელებენ შეტევას და ჯარისკაცებს გზავნიან ისეთ „საცეცხლე ზონებში“, რომლებიც გაჯერებულია მოწინააღმდეგის მოიერიშე დრონებით, ნაღმებით და მოქცეულია საარტილერიო ცეცხლის ქვეშ.
წლის დასაწყისში რუსული დანაკარგების შეფასებები უფრო დაბალი იყო. აპრილში NATO-ს გენერალურმა მდივანმა, მარკ რუტემ განაცხადა, რომ ცალკეულ თვეებში რუსეთი დაღუპულებისა და მძიმედ დაჭრილების სახით 30-35 ათას სამხედროს კარგავდა.
აგვისტოს ბოლოსთვის NATO-ს პროგნოზები გაიზარდა. ალიანსის გენერალური მდივნის მოადგილემ, რადმილა შეკერინსკამ აღნიშნა, რომ NATO-ს ანალიზის მიხედვით, რუსეთის შეიარაღებული ძალები ამჟამად ყოველთვიურად 40 ათასზე მეტ ადამიანს კარგავენ.
Discussion about this post