ევროკავშირმა უკრაინას 4.36 მილიარდი ევრო გადაურიცხა .ინფორმაციას უკრაინული მედია ავრცელებს და წერს, რომ ევროპულმა კომისიამ უკრაინის მხარდაჭერის 90-მილიარდიანი სესხის ფარგლებში მორიგი დახმარება გამოყო. მათივე ცნობით, გამოყოფილი თანხიდან 3.7 მილიარდი ევრო მაკროფინანსურ დახმარებას (MFA) მოხმარდება, ხოლო 658 მილიონი ევრო – სამხედრო საჭიროებებს.
არსებული ინფორმაციით, 3.7 მილიარდი ევროს ტრანში უკრაინას საჯარო სერვისებისა და სახელმწიფო ინსტიტუტების უწყვეტ ფუნქციონირებაში დაეხმარება. თანხის მისაღებად კიევმა წარმატებით შეასრულა 12-ვე დასახული პირობა, მათ შორის საგადასახადო, საბაჟო და ბიუჯეტის დაგეგმვის რეფორმები. ხოლო, 658 მილიონი ევრო მიმართული იქნება დრონების, რაკეტების, რადარებისა და საბრძოლო მასალების შესასყიდად. დაფინანსების უდიდესი ნაწილი უშუალოდ უკრაინულ თავდაცვით საწარმოებს მოხმარდება.
ევროკომისიის პრეზიდენტის, ურსულა ფონ დერ ლაიენის განცხადებით, ეს დახმარება სასიცოცხლოდ მნიშვნელოვანია ომის პირობებში მეხუთე ზამთრის წინაშე მდგარი უკრაინისთვის. 2026 წლის ბოლომდე ევროკავშირს უკრაინისთვის კიდევ 25.2 მილიარდი ევროს ფინანსური მხარდაჭერა აქვს დარეზერვებული.
Discussion about this post