“თამარ ბაჩალიაშვილი მოკლეს… მე დიდი ეჭვი მაქვს რომ ეს ყველაფერი იცის ღარიბაშვილმა და ეს არის მისი ვაჭრობის საგანი. ღარიბაშვილმა ძალიან ბევრი იცის. ამას უსაფუძვლოდ არ ვამბობ, იმით ვასაბუთებ, რომ ვილა ალგეთის მეპატრონე იყო იგივე ღარიბაშვილი, რომელმაც არ უარყო ნათესაური კავშირი ირაკლი ღარიბაშვილთან. ის რამდენიმე თვის შემდეგ საეჭვო ვითარებაში გაქრა, კაცი, რომელიც იძახდა, რომ თქვენი შვილი მოკლეს.“ – ამბობს ფორმულასთან თამარ ბაჩალიაშვილის დედა.
თამარ ბაჩალიაშვილის ოჯახი პროკურატურაში მივიდა, ისინი გამოძიების ხელახლა – მკვლელობის მუხლით დაწყებას მოითხოვენ.
„ვილა ალგეთი“ თეთრიწყაროსკენ მიმავალ გზაზე მდებარეობს — იმ ტერიტორიის სიახლოვეს, სადაც გამოძიების ვერსიით თამარმა გაიარა, სანამ ტყეში (სადაც მოგვიანებით გარდაცვლილი იპოვეს) შევიდოდა. ოჯახის ადვოკატები აცხადებდნენ, რომ სასტუმროს გარე მეთვალყურეობის კამერებს აუცილებლად უნდა დაეფიქსირებინა მისი ავტომობილი და ის, თუ ვინ იჯდა საჭესთან, ან ხომ არ მიჰყვებოდა სხვა მანქანა. ვილა ალგეთის კამერების ჩანაწერებში წყვეტები აღმოჩნდა.
2020 წლის 18 ივლისს, 23, წლის თამარ ბაჩალიაშვილი დილის 11:00 საათზე სახლიდან გავიდა და მას შემდეგ ახლობლებთან კონტაქტი არ ჰქონია. 5-დღიანი ძებნის შემდეგ სამართალდამცველებმა ის თეთრიწყაროს ტყეში, საკუთარ მანქანაში გარდაცვლილი იპოვეს. 2020 წლის 17 დეკემბერს პროკურატურამ საქმის გამოძიება დაასრულა და განაცხადა, რომ თამარ ბაჩალიაშვილის მიმართ დანაშაულის ჩადენას ადგილი არ ჰქონია და მან სიცოცხლე თვითმკვლელობით დაასრულა.
Discussion about this post