საფრანგეთში, გერმანიასა და ევროპის სხვა ქვეყნებში ათობით ათასმა დემონსტრანტმა მასშტაბური საპროტესტო აქცია გამართა . ინფორმაციას Guardian ავრცელებს და წერს, რომ საფრანგეთის შსს-ს მონაცემებით, ქვეყნის მასშტაბით აქციებში 320 000-მდე ადამიანმა მიიღო მონაწილეობა, მათგან 70,000-მა – პარიზში. ქვეყნის შს მინისტრის ცნობით, პარიზში, ლიონსა და ტულუზაში ვითარება საღამოს უკიდურესად დაიძაბა, რის შედეგადაც შაბათს საფრანგეთში სულ 565 ადამიანი დააკავეს.
გამოცემა წერს, რომ გერმანიაში ახალგაზრდული მოძრაობის “Gen Z regelt!” ორგანიზებულ აქციებზე ათასობით მოქალაქე გამოვიდა განათლების, ჯანდაცვისა და ხელმისაწვდომი ფასების მოთხოვნით. ბერლინში, ჰამბურგსა და კელნში პოლიციამ წყლის ჭავლი და წიწაკის სპრეი გამოიყენა, ხოლო ფრანკფურტში არეულობის დროს სულ მცირე ორი მაღაზია გაიძარცვა.
მედიის ინფორმაციით, ალბანეთში განათლების სამინისტროსთან გამართული მშვიდობიანი აქცია მას შემდეგ დაიძაბა, რაც ნიღბიანმა ახალგაზრდებმა პოლიციას ცეცხლსასროლი ბომბები და ქვები დაუშინეს. მომიტინგეები პრემიერმინისტრ ედი რამას გადადგომას ითხოვენ. ფრანგული სტუდენტური ორგანიზაციების განცხადებით, პროტესტი არ შეწყდება – სამშაბათს და ხუთშაბათს სკოლებისა და უნივერსიტეტების ბლოკირება იგეგმება, რის შემდეგაც სტუდენტები 5 ნოემბერს დაგეგმილ პროფკავშირების მასშტაბურ გაფიცვას შეუერთდებიან.
Discussion about this post